रुसको कोरोना अस्पतालमा आगलागी

एजेन्सी । रुसको सेन्ट पिटर्सबर्ग शहरमा रहेको एक कोभिड–१९ अस्पतालमा आगलागी हुँदा कम्तीमा पाँच जनाको मृत्यु भएको छ ।

स्थानीय प्रशासनका अनुसार अहिलेसम्म झण्डै एक सय ५० जनालाई अस्पतालबाट सुरक्षित रुपमा निकालिएको छ । घटनामा कति जना घाइते भएका छन् भन्नेबारेमा थप विवरण आउन बाँकी छ ।

रुसी समाचार एजेन्सीहरुका अनुसार भेन्टिलेटरमा शर्ट सर्किट हुँदा आगलागी भएको हो । घटनामा ज्यान गुमाएका सबै भेन्टिलेटरमा राखिएका बिरामी भएको बताइएको छ ।

कोरोना भाइरसको सङ्क्रमण बढ्ने क्रम नरोकिएको रुसमा अर्काे दुःखद घटना घटेको हो । हिजो मात्रै ११ हजार ६ सय ५६ जनामा कोरोना सङ्क्रमण पुष्टि भएसँगै रुसमा कुल सङ्क्रमितको सङ्ख्या दुई लाख ३२ हजार २ सय नाघेको छ ।

रुसमा अहिलेसम्म २१ सय १६ जनाले ज्यान गइसकेको छ ।