सुनको मूल्य फेरि १ हजार रुपैयाँले बढ्यो, यस्तो भन्छन् व्यवसायी !

काठमाडौँ । नेपाल सुनचाँदी व्यवसायी महासंघका अनुसार आज छापावाल सुन प्रतितोला हजार रूपैयाँ बढेर ८९ हजार ६ सय रूपैयाँ कायम भएको छ, जुन अहिलेसम्मको सर्वाधिक हो।

यसअघि गत बुधबार कायम भएको सुनको मूल्य सर्वाधिक थियो । उक्त दिन छापावाल सुन प्रतितोला ८८ हजार ६ सय रूपैयाँ कायम भएको थियो।

तेजावी सुनको मूल्य पनि हजार रूपैयाँ बढेको छ। महासंघका अनुसार बिहीबार तेजावी सुनको मूल्य प्रतितोला ८९ हजार एक सय ६० रूपैयाँ कायम छ।

नेपाल सुनचाँदी व्यवसायी महासंघका वरिष्ठ उपाध्यक्ष माणिक रत्न शाक्य अन्तर्राष्ट्रिय बजारमा सुनको मूल्य बढेकाले नेपालमा पनि बढिरहेको बताउँछन्। “केही दिनअघि प्रतिऔंश १६ सय डलर पर्ने सुनको मूल्य अहिले बढेर १७ सय ८० पुगिसकेको छ,” उनले भने।

उनले चीन–अमेरिका शितयुद्ध, लगानीकर्ताको सुनमा आकर्षण हुनुलगायत कारणले पनि सुनको मूल्य बढिरहेको बताए। यस्तै, रिजर्भ बैंकले सुन किनेर थुपारिरहेकाले पनि यसको मूल्य बढेको उनको भनाइ छ।

“अन्तर्राष्ट्रिय सिनारियो हेर्दा तत्काल सुनको मूल्य घट्न सक्ने देखिँदैन,” उनले सुनाए।