यो शहरमा

जुलुसमा छन् बेरोजगारहरु, न जन्ती न मलामी यो शहरमा

आफ्नै घर जलाए मैले कत्ति अभाव छैन खरानी यो शहरमा ।

जल्नका लागि पालोको प्रतीक्षामा घाट घाटमा छन् लासहरु

रोजगारको लागि बिदेश जाने लाइनमा छ जवानी यो शहरमा ।

कहिले उँभो लाग्छ यो देश भन्दै ओरालो लाग्दैछन मानिसहरु

चलेको छ खुट्टा पछि फर्केका किचकन्याहरुको कहानी यो शहरमा ।

देवता हराएर मन्दिर रित्तिए पछि दिन पनि रात भएको छ

लासहरुको जुलुस चले पनि छाएको छ बिरानी यो शहरमा ।

अब पुरानो भइसक्यो भन्छ्न राक्षसहरुको कथा पनि

जता पाइला टेक्छु उतै भेटछु तिनकै निशानी यो शहरमा ।