तिमिहरु मर

तिनीहरूले
मेरा हजुरबालाई भने- तिमी मर
तिम्रा छोराछोरीले सुख पाउनेछन्
हजुरबाले पत्याए
र, मरे ।

त्यसपछि तिनीहरूले मेरा बालाई भने-
तिमी मर
तिम्रा छोराछोरीले सुख पाउनेछन्
बाले पत्याए
र मरे !

त्यसपछि तिनीहरूले
मलाई भने-
तिमी मर
तिम्रा छोराछोरीले सुख पाउनेछन्

मैले पनि पत्याएँ
र म पनि मरेँ !

आज तिनीहरूले
मेरा छोराछोरीलाई भन्दैथे
तिमीहरू मर
तिम्रा छोराछोरीले सुख पाउनेछन्

तर अहिले
मेरा छोराछोरीले
तिनीहरूलाई भने-
अब तिमीहरू मर
हाम्रा छोराछोरीले सुख पाउने छन् !