म्याचमै बेहोस भएर ढलेका चर्चित फुटबलरको मृत्यु

उरुग्वेयन डिफेन्डर जुआन इजक्वियर्डोको निधनले दक्षिण अमेरिकी फुटबल समुदायलाई शोकमा डुबाएको छ । कोपा लिबर्टाडोरेसको खेलको क्रममा, इजक्वियर्डोको हृदय गति अनियमित भएपछि मैदानमा नै बेहोस भएका थिए ।

इजक्वियर्डो अगस्ट २२ मा ब्राजिलियन टिम साओ पाउलोविरुद्ध नेसिओनलको खेलको क्रममा ८४औं मिनेटमा मैदानमा बेहोस भएर ढलेका थिए। उनलाई तुरुन्तै एम्बुलेन्समा लिएर अल्बर्ट आइन्स्टाइन अस्पतालको आईसीयूमा उपचारका लागि भर्ना गरिएको थियो। अस्पतालले दिएको विज्ञप्ति अनुसार, कार्डियक अरिद्मियाको कारणले कार्डियोपल्मोनरी अरेस्ट भई मस्तिष्क मृत्यु भएपछि इजक्वियर्डोको निधन भएको हो ।

उरुग्वेको नेसिओनल क्लबले X (पूर्व ट्विटर) मा लेखेको छ, ‘हाम्रो प्रिय खेलाडी जुआन इजक्वियर्डोको निधनले हाम्रो हृदयमा गहिरो शोक र स्तब्धता छाएको छ । हामी उनको परिवार, साथीभाइ, सहकर्मी र आफन्तहरूप्रति गहिरो समवेदना व्यक्त गर्दछौं । नेसिओनल शोकमा छ ।’

उरुग्वे फुटबल संघले यो खबरलाई अत्यन्त पीडादायक भनेको छ । अर्जेन्टिना, पेरु, पाराग्वे र कोलम्बियाका राष्ट्रिय फुटबल संघहरूले पनि इजक्वियर्डोको परिवार र साथीहरूलाई समवेदना व्यक्त गरेका छन् । दक्षिण अमेरिकी फुटबलको शोकलाई व्यक्त गर्दै, दक्षिण अमेरिकी फुटबलको शासी निकाय CONMEBOL का अध्यक्ष एलेजान्ड्रो डोमिंग्वेजले भने, ‘दक्षिण अमेरिकी फुटबल शोकमा छ ।’