सवारी दुर्घटनामा चार जनाको मृत्यु

काठमाडौं । पर्वतको जलजला गाउँपालिका–५ गैरीगाउँस्थित सडकमा गिदेश्वरबाट गैरीगाउँतर्फ आउँदै गरेको ग.१ त २२६० नम्बरको ट्याक्टर सडकबाट करिब १ सय मिटर तल खसेर मंगलबार साँझ दुर्घटना हुँदा ट्याक्टरमा सवार सोही ठाउँ बस्ने १५ वर्षीय रोशन परियारको घटनास्थलमै मृत्यु भएको छ । साथै दुर्घटनामा घाइते भएका ट्याक्टर चालकको मणिपाल अस्पताल पोखरामा उपचार भइरहेको छ ।

कपिलवस्तुको महाराजगंज नगरपालिका–३ जमुनीस्थित सडकमा तौलिहवाबाट बहादुरगंजतर्फ जाँदै गरेको युपि ५५ डब्लु १८५७ नम्बरको मोटरसाइकलको ठक्करबाट पैदलयात्री सोही ठाउँ बस्ने ७५ वर्षीय बाथु पालको मंगलबार दिउँसो मृत्यु भएको छ । ठक्करबाट गम्भीर घाइते भएका उनको सिटि अस्पताल भैरहवामा थप उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको जिल्ला अस्पताल तौलिहवामा उपचार भइरहेको छ । मोटरसाइकल चालकलाई प्रहरीले नियन्त्रणमा लिएको छ ।

रूकुम पश्चिमको आठबिसकोट नगरपालिका–९ गिजास्थित सडकमा रा.१ त ३८९१ नम्बरको ट्याक्टर सडकबाट करिब ३ सय मिटर तल खसेर मंगलबार राति दुर्घटना हुँदा चालक त्रिबेणी गाउँपालिका–५ बस्ने २० वर्षीय नबिन परियारको मृत्यु भएको छ । दुर्घटनामा गम्भीर घाइते भएका उनको नगर अस्पताल आठबिसकोटमा उपचारको क्रममा मृत्यु भएको हो ।

सिन्धुलीको कमलामाई नगरपालिका–९ कोरूङखोलास्थित सडकमा भिमानबाट दुधौलीतर्फ जाँदै गरेको ना.८ ख ५८६२ नम्बरको ट्रकमा प्र.२–०२–००५ प २०७१ नम्बरको मोटरसाइकल ठक्कर खाई मंगलबार राति दुर्घटना हुँदा मोटरसाइकल चालक सोही नगरपालिका–१० सरकारीटोल बस्ने ३४ वर्षीय जीवन लाल दमाईको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल सिन्धुलीमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।

विभिन्न धनमाल चोरी

तारकेश्वर नगरपालिका–४ पुरानो गुहेश्वरी डेरा गरी बस्ने गोरखा, गोरखा नगरपालिका–१ घर भएका २७ वर्षीय रोशन गुरूङको कोठाबाट सुनको ब्रास्लेट र औंठी गरी करिब १ लाख ४७ हजार रूपैयाँ बराबरको धनमाल मंगलबार साँझ चोरी भएको छ ।
प्रहरीले चोरीमा संलग्न हाल फरार व्यक्तिको खोजी गर्नुका साथै यस सम्बन्धमा आवश्यक अनुसन्धान गरिरहेको छ ।