हमासको सशस्त्र शाखाद्वारा बन्धकलाई जीवित देखाउने भिडियो सार्वजनिक

गाजा सिटी (प्यालेस्टिनी क्षेत्रहरू) । हमासको सशस्त्र शाखाले शनिबार गाजामा जीवित इजरायली बन्धक हिब्रू भाषामा टेलिफोनमा कुरा गरिरहेको भिडियो जारी गरेको छ ।

इजरायली मिडियाले उनलाई एल्काना बोहबोटका रूपमा पहिचान गरेको छ । उनलाई हमासको सन् २०२३ अक्टोबर ७ को आक्रमणका क्रममा दक्षिणी इजरायलको एउटा सङ्गीत महोत्सवको स्थलबाट अपहरण गरिएको थियो । हमासको उक्त आक्रमणपछि गाजामा युद्ध सुरु भएको थियो ।

इजेदिन अल–कसम ब्रिगेडले जारी गरेको चार मिनेटभन्दा बढीको क्लिपमा उनी सानो कोठामा बसेर साथी र परिवारका केही सदस्यहरूसँग कुरा गरिरहेको देखिन्छ । यस्तो कल वास्तवमा भएको हो कि होइन भनेर पुष्टि हुन सकेन र एएफपीले भिडियो कहिले खिचिएको थियो भनेर प्रमाणित गर्न सकेन ।

फुटेजमा बोहबोटले ल्यान्डलाइन टेलिफोनमा कुरा गरेको देखिन्छ, जसमा उनले एक साथीलाई आफ्नी श्रीमतीलाई ह्वाइट हाउसमा लिएर अमेरिकी राष्ट्रपति डोनाल्ड ट्रम्पलाई भेट्न आग्रह गरेको देखिन्छ ।

हालैका हप्ताहरूमा बोहबोटको यो तेस्रो यस्तो भिडियो हो । अघिल्लो क्लिप मार्चको अन्त्यमा जारी गरिएको थियो । त्यस भिडियोमा उनले इजरायली सरकारलाई आफ्नो स्वतन्त्रता सुनिश्चित गर्न अनुरोध गरेका थिए ।

सन् २०२३ मा हमासले इजरायलमा गरेको आक्रमणका क्रममा बन्धक बनाइएका दुई सय ५१ जना मध्ये ५८ जना गाजामा बन्दी बनाइएका छन् । तिनमा ३४ जनाको मृत्यु भएको इजरायली सेनाले जनाएको छ । रासस/एएफपी