जम्मु–कश्मीरमा पर्यटकमाथि आक्रमण हुँदा पाँच जनाको मृत्यु

श्रीनगर । भारतको जम्मु–कश्मीरमा मंगलबार केही बन्दूकधारीहरूले पर्यटकहरूको एक समूहमाथि गोली प्रहार गरेका छन्, जसका कारण कम्तीमा पाँच जनाको ज्यान गएको छ भने केही अन्य घाइते भएका छन्। यस घटनाप्रति हिमाली क्षेत्रका एक वरिष्ठ नेताले गहिरो दुःख व्यक्त गरेका छन् ।

‘पाहलगाममा पर्यटकहरूमाथि भएको यो कायरतापूर्ण आक्रमणप्रति म गम्भीर रूपमा निन्दा प्रकट गर्दछु। यस हृदयविदारक घटनामा पाँच जना निर्दोष व्यक्तिहरूले ज्यान गुमाउनु परेको र अन्य केही घाइते भएको खबरले हामी सबैलाई मर्माहित बनाएको छ,’ जम्मु र कश्मीर पीपुल्स डेमोक्र्याटिक पार्टीकी अध्यक्ष तथा पूर्व मुख्यमन्त्री श्रीमती महबुबा मुफ्तीले बताए ।

यस हमलाको जिम्मेवारी हालसम्म कुनै पनि समूहले लिएको छैन। तथापि, मुस्लिम बहुल यो क्षेत्रमा सन् १९८९ देखि सशस्त्र आन्दोलन जारी रहेको छ, जसमा केही समूहहरू या त स्वतन्त्रता चाहन्छन् वा पाकिस्तानसँग एकीकरणको पक्षमा छन् । पाकिस्तानले कश्मीरको एक भागमा नियन्त्रण राखेको छ र भारतजस्तै पुरै क्षेत्रमाथि आफ्नो दाबी गर्दछ ।

प्रधानमन्त्री नरेन्द्र मोदी नेतृत्वको भारतीय जनता पार्टी (भाजपा)का नेता श्री रविन्द्र रैनाले भारतीय सञ्चार माध्यमसँग कुरा गर्दै भने, ‘कश्मीरको प्राकृतिक सौन्दर्य हेर्न आएका निहत्था र निर्दोष पर्यटकहरूलाई लक्षित गरी गरिएको यो आतंककारी हमला पूर्ण रूपमा निन्दनीय छ ।’ उनका अनुसार केही घाइते पर्यटकहरूलाई नजिकैको अस्पतालमा उपचारका लागि भर्ना गरिएको छ ।

आधिकारिक तथ्यांक अनुसार सन् २०२४ मा करिब ३५ लाख पर्यटकले कश्मीर भ्रमण गरेका थिए, जसमा अधिकांश घरेलु पर्यटकहरू थिए । भारतले सन् २०२३ मा श्रीनगरमा कडा सुरक्षाबीच जी२० पर्यटन सम्मेलन आयोजना गरेको थियो, जसको उद्देश्य क्षेत्रमा सामान्य अवस्था फर्किएको सन्देश दिनु थियो ।

सन् २०१९ मा भारत सरकारले कश्मीरको सीमित स्वायत्तता खारेज गरी प्रत्यक्ष शासन व्यवस्था लागू गरेपछि हिंसात्मक गतिविधिहरूमा केही कमी आएको देखिएको छ। हाल कश्मीर क्षेत्रमा करिब पाँच लाख भारतीय सुरक्षाकर्मी स्थायी रूपमा तैनाथ छन् ।

भारतले प्रायः यस्ता घटनाहरूमा पाकिस्तानको संलग्नता रहेको आरोप लगाउँदै आएको छ, यद्यपि पाकिस्तानले उक्त आरोप अस्वीकार गर्दै कश्मीरी जनताको आत्मनिर्णयको अधिकारको पक्षपोषण मात्रै गर्ने बताउँदै आएको छ । रासस/एएफपी