युक्रेन वार्ताको नयाँ चरण बेलायतमा

लन्डन । युक्रेनमा रुसको युद्ध अन्त्य गर्ने अमेरिकाको नयाँ प्रयासका बीच बेलायतले बुधबार संयुक्त राज्य अमेरिका, युक्रेन र युरोपेली राष्ट्रहरू संलग्न नयाँ चरणको वार्ताको आयोजना गर्दैछ । अमेरिकी राष्ट्रपतिका दूत स्टिभ विटकफले यस हप्ता मस्को भ्रमण गर्ने ह्वाइट हाउसले पुष्टि गरेको छ ।

अमेरिकी राष्ट्रपति डोनाल्ड ट्रम्पले पदभार सम्हालेपछि यो उनको चौथो रूस भ्रमण हुनेछ । लन्डन बैठक अमेरिकी मिडियाले जनाएअनुसार अमेरिकी राष्ट्रपति ट्रम्प क्रिमियामा अधिग्रहित भूमिलाई रूसी क्षेत्रको रूपमा मान्यता दिन तयार भएको समयमा आएको हो । समाचारहरूका अनुसार यो प्रस्ताव पहिलो पटक गत हप्ता पेरिसमा युरोपेली राष्ट्रहरूसँगको यस्तै बैठकमा उठाइएको थियो ।

त्यसयता ट्रम्पले द्रुत प्रगति नभएमा सङ्घर्ष अन्त्य गर्ने प्रयासहरूमा ‘पास गर्ने’ धम्की दिएका छन् । यद्यपि रूसले छोटो इस्टर युद्धविरामपछि यस हप्ता हवाई आक्रमण पुनः सुरु गर्‍यो र युक्रेनका राष्ट्रपति भोलोदिमर जेलेन्स्कीले मङ्गलबार उहाँको देश युद्धविरामपछि मात्र रूससँग प्रत्यक्ष वार्ताका लागि तयार रहेको बताए ।

क्रेमलिनले युद्धविराम सम्झौतामा हतार गर्न नसक्ने चेतावनी दिएको छ । ट्रम्पले चुनावी अभियानमा २४ घण्टामा मस्को र किएभबीच सम्झौता गर्ने वाचा गर्नुभएको थियो तर युक्रेनमा आफ्नो सेना रोक्न रुसी राष्ट्रपति भ्लादिमिर पुटिनबाट छुट प्राप्त गर्न असफल भएका छन् । सप्ताहन्तमा ट्रम्पले दुई पक्ष युद्धविरामको नजिक पुग्ने कुनै सङ्केत नभए पनि ‘यस हप्ता’ सम्झौता हुन सक्ने आशा गरेको बताए ।

गत बिहीबार घटनाहरूबारे छलफल गर्न अमेरिकी, फ्रान्सेली र बेलायती विदेशमन्त्रीहरूका साथै जर्मनीका एक वरिष्ठ अधिकारी पेरिसमा भेटेका थिए । अमेरिकी विदेशमन्त्री मार्को रुबियोले युद्ध अन्त्य गर्न अमेरिकी योजना प्रस्तुत गरेको तर कुनै विवरण नदिइएको बताए । रुबियोले पेरिस बैठकपछि टेलिफोन वार्तामा आफ्ना रूसी समकक्षी सर्गेई लाभारोभसँग पनि योजनाबारे छलफल गरे । पेरिस वार्तापछि रुबियो र ट्रम्पले द्रुत प्रगति नदेखेमा संयुक्त राज्य अमेरिका शान्ति वार्ताबाट बाहिरिन सक्ने चेतावनी दिएका छन् ।