समाजमा बढेका हत्या, हिंसा र बलात्कार जस्ता जघन्य अपराधबाट देशलाई जोगाउन गृहमन्त्रीलाई आग्रह

काठमाडाैं । बाल अभियन्ता प्रेन्सा रेग्मीले समाजमा बढेका हत्या, हिंसा र बलात्कार जस्ता जघन्य अपराधबाट देशलाई जोगाउन सुझाएकी छन् ।

आज गृहमन्त्रालयमा गृहमन्त्री बालकृष्ण खाँडलाई भेटेर उनले जघन्य अपराधबाट मुक्ति दिँदै महिला र बालबालिकालाई सुरक्षा दिन कडा कानुन बनाउन सुझाएकी हुन् ।

समाजमा नकारात्मक प्रभाव धेरै परिरहेकोे बताउँदै अभियन्ता रेग्मीले साना बालबालिकालाई यस्ता अपराधबाट कसरी जोगिने भन्ने कुरा सानैदेखि सिकाउन र कडा कानुन बनाएर अपराधीलाई कारबाही गर्नुपर्ने बताइन् ।

प्रहरी हाम्रो साथी भन्ने कुरा बालबालिकालाई बुझाउन आवश्यक छ, रेग्मीले भनिन् अहिले त हामी जस्ता बालबालिका र महिला दिदीबहिनीलाई बाटोमा निस्किन डर लाग्छ, यो डर भगाउने गरी सरकारले कडा कानुन ल्याएर काम गनुपर्यो ।

त्यस्तै गृहमन्त्री खाँडले सरकारले बालबालिका, महिला र युवाहरुको सोच, क्षमताबाट समाज बनाउन कसरी प्रेरित गर्ने भन्ने कुरा अबको आवश्यक्ता रहेको बताइन् ।

सबै नागरिकले आफ्नो जीवन स्वतन्त्र भएर जिउन पाउनुपर्ने बताउँदै गृहमन्त्री खाँडले सम्पूर्ण नागरिकको जीवन रक्षा राष्ट्रको पहिलो दायित्व भएको बताए ।

राज्यको निर्माण नै नागरिकको जीवन रक्षाको लागि हो, गृहमन्त्री खाँडले भने, राज्य प्रणालीमा भएका कमीकमजोरीलाई सुधार्दै सुरक्षास्थितीलाई बलियो र सुदृढ बनाउने प्रयासमा सरकार लागेको छ ।

सरकार र नागरिकको हातेमालोले मात्रै यस्ता पीडाबाट मुक्त गर्न सकिने भन्दै मन्त्री खाँडले बालबालिकाहरुका लागि विद्यालयमा सामुदायिक सुरक्षा कार्यक्रम ल्याएको समेत स्मरण गराए । पाठ्यक्रममै यसबाट बच्ने उपाय राख्न सके आउँदो जेनेरेशनमा अपराध मुक्त र सुन्दर नेपाल बन्ने उनको भनाइ छ ।