माया

नदेखेनि नभेटेनि दिलभित्र बस्छ्यौ
कतै टाढा नजाउ भन्दै मुटुभित्र राख्छ्यौ।
माया भन्या यही हो कि सोध्न सकिएन
कति माया गरेकी छ्यौ हिसाब राखिएन।

लिनुदिनु केही छैन, स्वार्थ छैन केही
जे छ त्यसमै सन्तोष छ ईर्ष्या छैन कुनै
मागेको नि छैन तिम्ले न त दिएँ मैले
यस्तो माया गज्जब रैछ भेट नहोस् कहिले ।

तस्बिरमा मुस्काउनु त्यति भए पुग्छ
मिलनको आशा छैन बाँचिरहे हुन्छ
स्पर्श र आलिङगन दुई दिनको खेल
निस्कपट निष्पाप माया रैछ अनमोल ।

जहाँ जाऊ, रमाउ तिमी खुसी भए पुग्छ
यो मनले हरपल तिम्रो माया खोज्छ।
माथिमाथि बादलमा हिमाल तराईमा
कुनै क्षण यस्तो छैन तिम्रो याद विना ।