सिकेर आउनू !

हात नहाली लोकलाई रुवाउने कसरी ? सिकेर आउनू
फोहोरमा हालेर सहर कुहाउने कसरी ? सिकेर आउनू

आफूले खान जानेर मात्रै पुग्दैन महोदय राजनीतिमा
खोसेर आफन्तलाई खुवाउने कसरी ? सिकेर आउनू

खानेकुरो देखेपछि देखिने गरी नै चुहिन्छ र्‍याल पनि,
नदेखिनेगरी र्‍याल चुहाउने कसरी ? सिकेर आउनू

बनाएरै उद्‌घाटन त जसले पनि गर्छ अरे दुनियाँमा
नबनाएरै उद्‌घाटन गरी आउने कसरी ? सिकेर आउनू

पानीमा जहाज त जोसुकैले चलाउँछ सिकेपछि
पाखोमा पानीजहाज चलाउने कसरी ? सिकेर आउनू

बजेट निकासा भएको छ रुख रोप्न सिमन्टीको
चौतारोको पीपल ढलाउने कसरी ? सिकेर आउनू

नजितेकै जसरी हल्लाउनु थियो भने जितेको किन ?!
चुनाव जितेपछिको जीउ हल्लाउने कसरी ? सिकेर आउनू !!