आफ्नो मुलुकले कोरोना विरुद्धको २० लाख डोज खोप तयार पारेको ट्रम्पको दाबी

एजेन्सी । अमेरिकी राष्‍ट्रपति डोनाल्ड ट्रम्पले कोरोना भाइरसको संक्रमणबाट बच्‍न आफ्नो मुलुकले २० लाख डोज खोप तयार पारेको दाबी गरेका छन्।

ती सबै प्रयोगका लागि तयार रहेको उनको भनाइ छ। “खाली ती खोप सुरक्षित रहेको वैज्ञानिकहरूको प्रमाणीकरण चाहिएको छ,” ट्रम्पले भने। वैज्ञानिकबाट प्रमाणीकरण नआउन्जेल ठूलो मात्रामा मानिसमा खोपहरू परीक्षण गर्न नसकिएको ट्रम्पले बताए। उनले कुन खोपको कुरा गरेको हुन् भन्‍ने स्पष्‍ट खुलाएनन्।

त्यसको प्रयोग थालिने समय सीमा पनि बताएनन्। न्युयोर्क टाइम्सको रिपोर्टअनुसार ट्रम्प प्रशासनले खोप तयार पार्न पाँचवटा कम्पनीलाई जिम्मा दिएको छ।

अमेरिकाका कतिपय कम्पनी खोप तयार पार्न वैज्ञानिकहरूको अनुमतिबिना नै लागिपरेका छन्। तिनमा मोडेर्ना, नोभाभ्याक्स, फाइजरलगायत ठूला कम्पनी पनि छन्। तीमध्ये मोडेर्नाले अरू कम्पनीको भन्दा अगाडिको यात्रा तय गरिसकेको विज्ञहरूको भनाइ छ।