‘तपाईंका अल्छी नागरिकले आफ्नो देश बनाउन नसकेर संसारका मानिसको आवश्यकता परेको हो’

काठमाडौं । काठमाडौं महानगरपालिकाका मेयर बालेन शाहले अमेरिका अल्छीहरुको देश भएकाे टिप्पणी गरेका छन् । सामाजिक सञ्जाल फेसबुकमा बालेनले अमेरिकी राष्ट्रपति डोनाल्ड ट्रम्पलाई सम्बाेधन गर्दै अमेरिकालाई अल्छीहरूको देश भन्दै टिप्पणी गरेका हुन् । 

अमेरिकी राष्ट्रपति डोनाल्ड ट्रम्पलाई सम्बोधन गर्दै उनले ईडीभीप्रति आफ्नो धारणा राखेका हुन् । सोही क्रममा उनले त्यहाँका नागरिकलाई अल्छी भएको आरोप लगाएका हुन् । 

नेपालमा अमेरिकाले गरेको सहयोगलाई ट्रम्पले ठगी भनेपछि त्यसको जवाफ दिँदै बालेनले सामाजिक सञ्जालमार्फत् यस्तो भनेका हुन् ।

शाहले लेखेका छन्, ‘हामीलाई हाम्रो देश तपाईंको भन्दा राम्रो भएको आभास गराइदिनु भएकोमा धन्यवाद । हाम्रा मान्छेले देश छाडी रहेका कारण नै हामी गरिब भएका हौँ,’ उनले अगाडि लेखेका छन् ‘तपाईंहरू गरिब हो किनकि तपाईंका अल्छी नागरिकले आफ्नो देश बनाउन सकेनन् । यस कारण तपाईंहरूलाई यसका लागि संसारका मानिसको आवश्यकता परेको हो ।’

बालेनले अमेरिकीले देश बनाउन नसक्ने भन्दै अल्छी मानिसलाई बाँकी संसार चाहिने कुरा बुझ्न ट्रम्पलाई सुझाव दिए । साथै बालेनले डिभी भिसा बन्द गर्न अनुरोध गरेका छन् ।