बजारको प्रतिक्रियापछि ट्रम्पद्वारा मेक्सिको र क्यानाडामाथिको भन्सार शुल्क फिर्ता

काठमाडौं । अमेरिकी राष्ट्रपति डोनाल्ड ट्रम्पले बिहीबार क्यानाडा र मेक्सिकोलाई लक्षित केही भन्सार शुल्क ढिलाइ गरेका छन् । यसबाट ओटावालाई प्रतिकारका उपायको आगामी लहर रोक्न अग्रसर गरायो भने वित्तीय बजारमा प्रतिकूल प्रभावपछि कम्पनी र उपभोक्तालाई राहत प्रदान गरेको छ ।

अर्थशास्त्रीले व्यापक भन्सार शुल्कले अमेरिकी विकासमा असर गर्न सक्ने र मुद्रास्फीति बढाउन सक्ने चेतावनी दिएपछि ट्रम्पको २५ प्रतिशतसम्मको भन्सार शुल्क मङ्गलबार लागू भएपछि सेयर बजार धरासायी भए ।

ट्रम्पले बिहीबार उत्तर अमेरिकी व्यापार सम्झौताले समेटेको क्यानाडा र मेक्सिकोबाट आयात हुने वस्तुमा नयाँ भन्सार शुल्कलाई रोक्ने आदेशमा हस्ताक्षर गरे । यद्यपि उनले आफ्नो निर्णय बजार अस्थिरतासँग जोडिएको सुझावलाई खारेज गर्नुभयो ।

अप्रिल २ सम्म रहने यो विलम्बले सवारी निर्मातालाई राहत प्रदान गर्दछ । अटो क्षेत्रमा उत्पादनका क्रममा पार्ट धेरै पटक उत्तर अमेरिकी सीमाहरू पार गर्दछन् ।

‘बिग थ्री’ अमेरिकी सवारी निर्माता- स्टेलान्टिस, फोर्ड र जनरल मोटर्स-सँगको वार्तापछि वासिङ्टनले सुरुमा संयुक्त राज्य अमेरिका-मेक्सिको–क्यानाडा सम्झौता (युएसएमसिए) मार्फत आउने अटोमा एक महिनाको छुट घोषणा गरेको थियो ।

ह्वाइट हाउसका एक अधिकारीका अनुसार क्यानाडाली आयातको लगभग ६२ प्रतिशत आयातले अझै पनि नयाँ भन्सार शुल्कको सामना गर्नेछ । यद्यपि यीमध्ये धेरै ऊर्जा उत्पादनमा १० प्रतिशतको कम दरमा कर लाग्छ ।

मेक्सिकोबाट आयातको लगभग आधा युएसएमसिएमार्फत आउँछ ।

ट्रम्पले थप कर अप्रिल २ मा आउने र ती ‘पारस्परिक प्रकृतिका’ हुने बताउनुभयो । उहाँले यसअघि वासिङ्टनले अनुचित ठानेका अभ्यासहरूको उपचार गर्न पारस्परिक भन्सार शुल्क लगाउने प्रतिज्ञा गर्नुभएको थियो ।

त्यस समयमा क्यानाडाली र मेक्सिकाली वस्तुले अझै पनि भन्सार शुल्कको सामना गर्न सक्छन् ।

ट्रम्पले अर्को हप्ताबाट लागु हुने स्टिल र एल्युमिनियम आयातका लागि व्यापक भन्सार शुल्कमा संशोधन नगर्ने पनि बताए ।