रूस–अमेरिका अर्को सम्पर्क ‘अर्को हप्ता’ हुन सक्छ : रुसी दूत

मस्को । वासिङ्टनसँग वार्तामा संलग्न एक वरिष्ठ रुसी अधिकारीले रुस र संयुक्त राज्य अमेरिकाले अर्को हप्ताको सुरुमा फेरि एकअर्कासँग सम्पर्क गर्न सक्ने बताएका छन् ।

क्रेमलिनको अन्तर्राष्ट्रिय अर्थतन्त्र प्रतिनिधि किरिल दिमित्रिएभले च्यानल वान टेलिभिजनलाई एक अन्तर्वार्तामा दुई पक्षबीचको अर्को सम्पर्क ‘आउँदो हप्ता नै’ हुनसक्ने बताउनुभएको तास समाचार एजेन्सीले जनाएको छ ।

रुसको सार्वभौम सम्पत्ति कोषका प्रमुख दिमित्रिएभ गत हप्ता वासिङ्टन जानुभएको थियो । रुसले युक्रेनमा आफ्नो सैन्य अभियान सुरु गरेपछि अमेरिका जाने उहाँ सबैभन्दा वरिष्ठ रुसी अधिकारी छन् ।

उनले रूसी पत्रकारहरूलाई आफूले सम्बन्धमा ‘सकारात्मक गतिशीलता’ देखेको बताए । तर आफ्नो पछिल्लो अन्तर्वार्तामा दिमित्रिएभले ‘अमेरिकी सरकारमा अझै पनि रुसका ठूलो सङ्ख्यामा शत्रुहरू छन्’ भने । ‘त्यसैले अहिले वार्ता पुनःस्थापित भएको छ भन्ने नाजुक आशा छ’, ‘सूचना आक्रमणहरू’ को सामना गर्नुपर्ने आवश्यकता उल्लेख गर्दै उनले भने ।

दिमित्रिएभले रुस र संयुक्त राज्य अमेरिका बीचको सम्बन्ध सुधारमा महत्त्वपूर्ण भूमिका निभाएका छन् । फेब्रुअरीमा साउदी अरबमा अमेरिकी राष्ट्रपति डोनाल्ड ट्रम्पका अधिकारीहरूसँगको वार्ताको पहिलो चरणमा उनले भाग लिएका थिए । रासस/एएफपी